صرخة وجع، صرخة عتب من مواطن لبناني لإخيه المهاجر... "رح تعطي برا كل شي ما عطيتو للبنان" !

منقولة من مواقع التواصل الإجتماعي:

لكل واحد راكض يضب 'الشنطة' ويفل بقلّو Good luck
بوعدك ببلاد الغربة اذا ما مشي حالك، بيمشي حال ولادك. مش لأنو برا رح يعطيك اكتر من لبنان، لأنو انت رح تعطي برا كل شي ما عطيتو للبنان.
برا ، رح تبطل مذهبي أو طائفي. رح تصير فجأة ( سبحان الله) منفتح وحضاري. يمكن نشوفك بثورة دعما لحقوق المثليّين، عم تنادي بالمساواة الاجتماعية. هون، ما إلك جلادة تنزل كرمال وطنك ومستقبلك، كرمال الحق و ضد الباطل، بس إلك جلادة تنذل كرمال الطايفة و كرمال الزعيم.
ببلاد برا، رح نشوفك منتظم و شغيل. يمكن تشتغل ١٢ ساعة ( مش يمكن، أكيد) و تحترم ال deadlines, و ما تطفنطز عالشغل.
ببلاد برا، رح تشتري الخيار و البندورة بالحبة، و عقلبك متل العسل.
ببلاد برا رح تدفع آجار بيت ( نص معاشك)، وعلى قد بساطك رح تمد إجريك، انت و عامل حالك مبسوط.
ببلاد برا رح تعطي أفضل ما عندك، و رح تلاقي.
و انا اكيد ، بس ترجع علبنان، و تغط الطيارة بمطار بيروت، رح تشلح بلاد برا و تلبس الطايفة و الزعيم.
شفناك و جربناك. ( أكيد بلا تعميم)
بس للتذكير، شي نهار اذا ضربك الحنين ببلاد برا، تذكر انو نحنا كم مليون، حاكمنا كم واحد. و تذكر، انو لو يلي هاجرو نزلو عالثورة الحقيقية، مش الإنتاج البوليوودي يللي عم نشوفو عالشاشات، كان لبنان مش متل بلاد برا، كان أحلى بكتير.
لبنان مش أوتيل، لبنان مش مخمرة، لبنان مش دعارة و فساد.
لبنان متل ما قال وديع الصافي ' قطعة سما' بس حكامو شياطين، وشعبو يا مندار، يا منهار.
لو لبنان بيحكي كان قلكم: ' الله يسامحكم!'

الآراء ووجهات النظر الواردة في هذا المقال لا تعبر بالضرورة عن آراء أو وجهات النظر أو السياسات الرسمية لموقع رميش دوت أورغ (rmeich.org).

المصدر: فريق عمل موقع رميش دوت أورغ